1993 წელს თბილისში ისრელის საელჩო გაიხსნა და ისრაელის პირველ, საგანგებო და სრლუფლებიან ელჩად საქართველოში ბარუხ ბენ-ნერია (ბირემბაუმი) დანიშნეს.

სოვეტოლოგიის ყოფილ ლექტორს, ისრელის პოლიციის ყოფილ ანალიტიკოსს მალე დავუახლოვდი და სახლშიც მოვიწვიე. მაშინ საქართველოში რთული ვითარება იყო და ისრაელის ელჩი დაცვის  თანხლებით  დადიოდა. ამიტომ, ვიდრე ის და მისი მეუღლე ჩემს საცხოვრებელ ბინაში შემოვიდოდნენ, დაცვამ ჩემი ბინა საგულდაგულოდ დაათვალიერა. ასე მოიქცა „ბიტახონი,“ როცა ელჩი საქართველოს მეცნიერებათა აკადემიის სამართლის ინსტიტუტში წარვადგინე. ბარუხ ბენ-ნერია საფუძვლიანად ერკვევოდა ტერორიზმის საკითხებში და ინსტიტუტში, ტერორიზმის თემაზე წაიკითხა  ლექცია.

ბარუხ ბენ-ნერია, სიმამრს, იერუსალიმის მერის - ტედი კოლეკის მეგობარს უმადლოდა დიპლომატიურ სარბიელზე გამოსვლას, მაგრამ საქართველოში ელჩობაზე მაინც არ ფიქრობდა.   

       
ბარუხ ბენ-ნერია იყო პირველი  დიპლომატი, რომელმაც კრწანისის სამთავრობო რეზიდენციის ტერიტორიაზე  დიპლომატების დასახლების შექმნის იდეა წამოაყენა. მაშინ, მე,  მას  იდეა  მოვუწონე და ამის შესახებ სახელმწიფო უზრუნველყოფის სამსახურის უფროსს -ირაკლი ანდრიაძეს მოვახსენე.

ისრელის ელჩი და სახელმწიფო უზრუნველყოფის სამსახურის უფროსი ერთმანეთს შეხვდნენ. ირაკლი ანდრიაძეს  იდეის განხორციელების შესაძლებლობა წინასწარ გაურკვევია და აღმოჩნდა, რომ ედუარდ შევარდნაძის დაცვა ასეთ პროექტს მხარს არ დაუჭერდა, რადგან ქვეყნის მეთაურის უსაფრთხოებას და მყუდროებას საფრთხე ემუქრებოდა თურმე.

ირაკლი ანდრიაძემ  ელჩთან შეხვედრისას ბენ-ერიას პირდაპირ უარი ვერ უთხრა, მაგრამ საჩოთირო შეკითხვა კი დაუსვა: პრობლემა არ გექნებათ, თქვენ და ირანის ელჩი მეზობლები რომ აღმოჩნდეთ?  რას ბრძანებთ, ახლოდან თუ არა,  შორიდან მაინც მივესალმებიო- უპასუხა ისრაელის ელჩმა. გაგვეცინა.

როცა  ირაკლი ანდრიაძის სამუშაო ოთახიდან  გამოვედით, ისრაელის ელჩი მეუბნება: მალხაზ ხომ კარგად ვუპასუხე? ჰგონიათ, რომ  ირანის ელჩით დამაფრთხობენ, საქართველოში  რა მაქვს ირანის ელჩთან გასაყოფი?

სხვათაშორის, მერე მაინც დაიწყეს კრწანიში დიპლომატიური ქალაქის მშენებლობის პროექტზე საუბარი, მაგრამ ბარუხ ბენ-ერია უკვე აღარ მუშაობდა ისრაელის ელჩად საქართველოში.

მალხაზ კოხრეიძე